WORLD DAY OF SOCIAL JUSTICE
මෙවර සමාජ සාධාරණත්වය පිළිබඳ ජාත්‍යන්තර දිනයේ තේමාව වන්නේ , “ඩිජිටල් ආර්ථිකය තුළ සමාජ සාධාරණත්වය සඳහා කැඳවීමක්.” යන්න යි. මෙවර තේමාවේ අරමුණ වන්නේ රටවල් සහ ඔවුන්ගේ ජනතාව අතර සමාජ සංවර්ධනයන්, සහයෝගීතාවය සහ සමඟිය ප්‍රවර්ධනය කිරීමයි. ඩිජිටල්මය වශයෙන් වී ඇති බෙදීම් මඟහරවා ගැනීම සහ ජනතාව අතර යහපත් රැකියා අවස්ථා ලබා දීම මඟින් ඩිජිටල් යුගයේ කම්කරු අයිතිවාසිකම් හා මානව හිමිකම් ආරක්ෂා කිරීම සඳහා ලෝකයේ රටවල් සමඟ සංවාදයක් ගොඩනැගීම ද මෙවර දිනයේ අරමුණ යි.
සමාජ සාධාරණත්වය සඳහා වූ දිනය ලංකාවට වැදගත් ඇයි?
ශ්‍රී ලංකාව දීර්ඝ කාලීන යුද්ධයකිනුත්, විවිධ කැරලි කෝලහාල සහ ගැටුම්වලින් හානියට පත් වූ සමාජයකි. එසේම දරිද්‍රතාවය, විරැකියාව, නූගත්කම, වෙනස්කොට සැලකීම ආදි සමාජ අසාධාරණයන් එදිනෙදා ජීවිතයේ මුණ ගැසෙන සමාජයකි. එහෙත් යුද්ධයෙන් පසුව යුද්ධය ආරම්භ වීමට බලපෑ හේතුවලට ප්‍රතිකාර කර, සිදු වූ අසාධාරණයන්ට යුක්තිය ඉටු කර යුද්ධයේ තුවාල සුවපත් කිරීමට තවමත් ශ්‍රී ලංකාව සමත් වී නැත.
කොවිඩ්-19 වසංගත සමය නව ආකාරයක සාමාජ අසාධාරණයන් බිහි කර ඇතැයි කිව හැකිය. ලෝකය පිළිගත් පරිදි කොවිඩ්-19 න් මිය යන්නන්ගේ දේහ භූමදානය කිරීමට ඉඩ නොදීම ඉන් මූලික එකකි. වසංගත තත්වය හමුව් වේ අධ්‍යාපනයට ඇති ප්‍රවේශය සමාජ විෂමතා, ඇති හැකි බව, නාගරික ග්‍රාමීය බව අනුව අහිමිව ගොස් තිබේ. රැකියා කප්පාදුවෙන් සහ අහිමි වීමෙන් ජනතාව මුහුණ දෙන අභියෝගයන් සුළුපටු නොවේ.
වතුකම්කරු ජනතාව දිනක මූලික වැටුප රු: 1000/= ක් කරන ලෙස කරන ඉල්ලීමේ 6 වැනි වසර ද ගෙවී යමින් තිබේ.
සමාජ සාධාරණත්වය පිළිබඳ ජාත්‍යන්තර දිනය සැමරීම මඟින් තිරසාර සංවර්ධනය, දරිද්‍රතාවය තුරන් කිරීම, පූර්ණ සහ ගෞරවනීය රැකියා ප්‍රවර්ධනය කිරීම, විශ්වීය සමාජ ආරක්ෂාව, ස්ත්‍රී පුරුෂ සමානාත්මතාවය සහ සමාජ යහපැවැත්ම හා සැමට යුක්තිය සඳහා ප්‍රවේශය ලබා ගැනීම සඳහා ලොව පුරා ප්‍රජාවන් දරන උත්සාහයන් කෙරෙහි අවධානය යොමු කෙරේ.
ශ්‍රී ලංකාව සමාජ අසාධරණයන්ට එරෙහිව නැගී සිටින්නේ කවදාද?
Comments
Post a Comment